Enter your keyword

“No Typical Working Day”, says ICES Cambodia Staff

មន្រ្តីទំនាក់ទំនងអន្តរជាតិអាយស៊ីអ៊ីអេស (ខេមបូឌា)៖ បទពិសោធការងារថ្មីផ្តល់គុណតម្លៃយ៉ាងល្អដល់ខ្ញុំ

កាលពីថ្មីៗនេះ និស្សិតម្នាក់ដែលទើបតែបញ្ចប់ការសិក្សាផ្នែកទំនាក់ទំនងអន្តរជាតិពីសាកលវិទ្យាល័យ អន្តរជាតិផារ៉ាហ្គន (Par​​a​gon International University) កញ្ញា ភួង សិរីជាតិ បានឈានជើងចូលប្រឡូកការងារថ្មីសន្លាងរបស់នាងនៅ អាយស៊ីអ៊ីអេស (ខេមបូឌា) ដែលជាស្ថាប័នជំនាញក្នុងការប្រឹក្សាយោបល់ និងផ្តល់សេវាកម្មសម្រាប់កម្មវិធីផ្លាស់ប្តូរការសិក្សាថ្នាក់វិទ្យាល័យនៅក្រៅប្រទេសក្នុងតម្លៃដ៏សមរម្យ។

ក្នុងតួនាទីជាមន្ត្រីទំនាក់ទំនងអន្តរជាតិ សិរីជាតិ បានឱ្យដឹងថា ខ្លួនមានកាតព្វកិច្ចការងារជាច្រើនដែលត្រូវរៀនសូត្របន្ថែមពីក្រុមការងារដែលមានបទពិសោធន៍ ខណៈពេលដែលបញ្ហាថ្មីៗត្រូវបានជួបប្រ​ទះ​ជា​រៀ​ងរាល់ថ្ងៃ។ ប៉ុន្តែដំណាក់កាលដំបូងក្នុងអាជីពនេះ ​សិរី​ជាតិ ​មានការស្ញប់ស្ញើងជាខ្លាំងចំពោះការបេ្តជ្ញាចិត្ត ភាព​មានទំនួលខុសត្រូវ និងជំនាញដ៏ប៉ិនប្រសប់របស់ក្រុមការងារនាង។  

កញ្ញា សិរីជាតិ បាន​លើកឡើង​ថា៖ «រឿង​មួយ​ដែល​ធ្វើ​ឱ្យ​ខ្ញុំ​ចាប់​អារម្មណ៍​ខ្លាំង​បំផុត​ គឺ​អាកប្បកិរិយាក្រុមកា​រ​ងា​រ​នៅ​ទី​នេះ ​ដែលពួកគាត់​មាន​ការ​គាំទ្រគ្នា លើកទឹកចិត្ត និងខិតខំប្រឹងប្រែងក្នុង​ការងារ​របស់​ពួក​គាត់។  

​ទោះបីជាក្រុមការងារទាំងអស់មកពីមជ្ឈដ្ឋានខុសៗគ្នា និងមានជំនាញខុសៗគ្នាក៏ដោយ ក៏ប៉ុន្តែពួកយើង​មាន​គោល​ដៅ​ដូច​គ្នា»។

ទន្ទឹមនឹងនោះ សិរីជាតិ ក៏មានអារម្មណ៍ថា នាងមានមោទនភាពចំពោះកិច្ចការដែលខ្លួនបានសម្រេចកន្លងមកផងដែរ ស្របពេលដែលនាងកំពុងជួយសិស្សជាច្រើនក្នុងការសម្រេចក្តីស្រមៃទៅសិក្សានៅក្រៅប្រទេស។ 

កញ្ញា បាន​ពន្យល់​ថា​៖ «​អ្វី​ដែល​អស្ចារ្យនោះ ​គឺ​ខ្ញុំ​មិនមែនធ្វើការ​​ត្រឹម​តែ​ជាមួយ​ក្រុម​ការងារ​របស់ខ្ញុំប៉ុណ្ណោះ​ទេ ប៉ុន្តែ​ក៏​ជាមួយ​សិស្ស​វ័យក្មេង​ដែល​ពោរពេញដោយ​ទេព​កោសល្យ សមត្ថភាព និងការ​ប្ដេជ្ញា​ចិត្តក្នុងការ​ទៅសិក្សា​នៅ​ក្រៅប្រទេសក្នុង​រយៈពេល​ប៉ុន្មាន​ខែ​ខាង​មុខ​ទៀតនេះផងដែរ​»​។  

«ខ្ញុំរីករាយនឹងធ្វើការជាមួយពួកគាត់ ហើយសមត្ថភាពពួកគាត់ពិតជាធ្វើឱ្យខ្ញុំស្ញប់ស្ញែងយ៉ាងខ្លាំង តាមរយៈឥរិយាបទ និងការទំនាក់ទំនងគ្នាទៅវិញទៅមក»។ 

តាម​ការ​សង្កេត​របស់​មន្ត្រីទំនាក់ទំនងអន្តរជាតិរូបនេះ​ នាងបាន​កត់​សម្គាល់​ឃើញ​ថា សិស្ស​ម្នាក់ៗ​មាន​ទេព​កោសល្យ និង​ជំនាញ​រៀងៗ​ខ្លួន ជា​ឧទាហរណ៍ សិស្ស​ខ្លះ​ពូកែ​សរសេរ ចំណែក​សិស្ស​ខ្លះទៀត​ពូកែ​និយាយ និង​គូរគំនូជាដើម។ ប៉ុន្តែដូច​ដែល​នាង​យល់​ឃើញ ក្រៅពីភាពខុសគ្នា ពួកគេក៏មានចំណុចដូចគ្នាដែរ សិស្ស​ដែលបាន​មក​ចូល​រួមក្នុង​កម្មវិធី​ផ្លាស់​ប្តូរការសិក្សានៅអាយស៊ីអ៊ីអេស (ខេមបូឌា) ភាគច្រើនមានភាពចាស់ទុំ ក្លាហាន មានការយល់ដឹងខ្ពស់ ហើយថែមទាំងមានភាពវៃឆ្លាតទៀតផង។ 

កញ្ញាសិរីជាតិ បន្ថែមថា៖ «មិនត្រឹមតែប៉ុណ្ណោះ សម្រាប់សិស្សរបស់អាយស៊ីអ៊ីអេស (ខេមបូឌា) ដែលកំពុងតែរីករាយនឹងឆ្នាំផ្លាស់ប្តូរការសិក្សារបស់ពួកគេនៅសហរដ្ឋអាមេរិក ក៏ធ្វើបានយ៉ាងល្អដែរក្នុងការសិក្សា និងការទំនាក់ទំនងជាមួយមនុស្សថ្មីៗរួមទាំងគ្រួសារចិញ្ចឹមរបស់ពួកគេផងដែរ។ ខ្ញុំ​អាចនិយាយបាន​ថា ពួក​គេមានការ​ផ្លាស់​ប្តូរ​យ៉ាង​ខ្លាំង​ក្នុង​រយៈ​ពេល​ប៉ុន្មាន​ខែ​កន្លង​មក​នេះ»។  

«ពួកគេកាន់តែមានទំនុកចិត្តលើខ្លួនឯង មានឯករាជ្យភាព និងចេះបើកចិត្តទូលាយ​ ហើយនេះ​ជា​កត្តា​មួយ​ដែល​ធ្វើ​ឱ្យ​ខ្ញុំ​ស្រលាញ់​ការងារ​របស់​ខ្ញុំ»។

ដោយសារតែហេតុផលទាំងនេះហើយ សិរីជាតិ បានពិពណ៌នាថ្ងៃធ្វើការរបស់នាងនៅអាយស៊ីអ៊ីអេស (ខេ​មបូឌា) ថាជាការងារដ៏អស្ចារ្យសម្រាប់នាង ព្រោះតួនាទីនេះ​តម្រូវឱ្យនាងរៀននូវអ្វីថ្មីៗ និងទទួលបានចំណេះដឹងថ្មីៗជារៀងរាល់ថ្ងៃ។  

កញ្ញាបន្តលើកឡើងថា​៖ «​តាំង​ពី​ថ្ងៃ​ដែល​ខ្ញុំ​ចាប់​ផ្តើម​ធ្វើ​ការ​នៅ​ទី​នេះ ខ្ញុំ​បាន​ចូល​រួម​ក្នុង​ការ​បណ្តុះបណ្តាល​ជាមួយ​សិស្ស ក៏ដូចជាអ្នកអាណា​ព្យាបាល ដើម្បីផ្ដល់ពត៌មាន​អំពី​ការ​សិក្សា​នៅ​ក្រៅប្រទេស។  

លើសពីនេះ ខ្ញុំថែមទាំងបានអភិវឌ្ឍជំនាញទំនាក់ទំនងរបស់ខ្ញុំតាមរយៈការធ្វើការជាមួយបុគ្គលិកតាមផ្នែកផ្សេងៗ។ ខ្ញុំពិតជាចូលចិត្តបរិយាកាសការងាររបស់ខ្ញុំណាស់ ព្រោះការងារនេះអនុញ្ញាតឱ្យខ្ញុំទទួលបានភាពរីកចម្រើន រួមទាំងទទួលបានជំនាញសំខាន់ៗដូចជា ការរៀបចំផែនការ របៀបគ្រប់គ្រងការងារ និងនាំឱ្យខ្ញុំក្លាយជាអ្នកជំនាញយ៉ាងច្បាស់លាស់»។ 

កញ្ញា សិរីជាតិ បានចាត់ទុក អាយស៊ីអ៊ីអេស (ខេមបូឌា) គឺជាកន្លែងមួយដែលនាងអាចមើលឃើញពីភាពប្រសើរឡើងជាច្រើនសម្រាប់ខ្លួនឯង ទាំងផ្នែកទិដ្ឋភាពជាក់ស្តែង និងផ្នែកក្នុងសង្គម។ 

នាងបន្ថែមថា៖ «សរុបមក ខ្ញុំសូមថ្លែងអំណរគុណយ៉ាងជ្រាលជ្រៅសម្រាប់ឱកាសការងារនៅអាយស៊ីអ៊ីអេស (ខេមបូឌា) ដែលជាការងារវិជ្ជាជីវៈដំបូងគេក្នុងអាជីពរបស់ខ្ញុំ។ សំខាន់ជាងនេះទៅទៀត ខ្ញុំរឹតតែមានភាពរីករាយដែលអាចធ្វើការជាមួយក្រុមការងារដែលបានផ្តល់ការណែនាំល្អ និងរួមចំណែកក្នុងដំណើរការងារមួយនេះ»។


កញ្ញា ភួង​ សិរីជាតិ និងក្រុមការងាររបស់នាងកំពុងធ្វើការយ៉ាងមមាញឹកដោយមិននឿយហត់ដើម្បីជួយសិស្សានុសិស្សជាច្រើនឱ្យសម្រេចក្តីស្រមៃទៅសិក្សានៅក្រៅប្រទេស។ ហើយប្រសិន​បើ​អ្នក​មានក្ដីស្រមៃ​នោះ ​អ្នក​ក៏​អាច​អញ្ជើញមកប្រឹក្សាយោបល់ផ្ទាល់ជាមួយ​ពួកគាត់ផង​​ដែរ ​ ។ កុំរង់ចាំរហូតដល់ថ្នាក់មហាវិទ្យាល័យ ចូលរួមកម្មវិធីសិក្សាថ្នាក់វិទ្យាល័យនៅក្រៅប្រទេសជាមួយអាយស៊ីអ៊ីអេស (ខេមបូឌា) ឥឡូវនេះ!

សម្រាប់ព័ត៌មានបន្ថែមអំពីរបៀបដែលអ្នកអាចចូលរួមក្នុងកម្មវិធីផ្លាស់ប្តូរការសិក្សាថ្នាក់វិទ្យាល័យជាមួយអាយស៊ីអ៊ីអេស (ខេមបូឌា) ព្រមទាំងតម្លៃសិក្សា និងដំណើរការដាក់ពាក្យសូមទាក់ទងមកកាន់លេខទូរស័ព្ទ៖ ០៩៨ ៦៨៦ ៩០១ ឬ០៦១​ ៩២៤ ១៤១។ ដើម្បីចូលរួម​ចុះឈ្មោះបាន អ្នកត្រូវតែឆ្លងកាត់ តេស្តជំនាញភាសាអង់គ្លេសដែលផ្តល់ដោយអាយស៊ីអ៊ីអេស (ខេមបូឌា) និងមានកំណត់ត្រាសិក្សាល្អ (មធ្យមភាគនិទេ្ទស «C» លើមុខវិជ្ជាសំខាន់ៗក្នុងរយៈពេល៣ ឆ្នាំចុងក្រោយ)។ ចុះឈ្មោះឥឡូវនេះ ដើម្បីធ្វើតេស្តភាសាអង់គ្លេស៖ https://forms.gle/3qifKLu79f4hx5uB7