ភាពខុសគ្នាមួយចំនួនរវាងប្រព័ន្ធអប់រំនៅប្រទេសកម្ពុជា និងនៅសហរដ្ឋអាមេរិក
ប្រព័ន្ធអប់រំ នៅគ្រប់ប្រទេសជុំវិញពិភពលោកត្រូវបានចាត់ទុកជាសកលថា ជាកត្តាជំរុញដ៏សំខាន់សម្រាប់ការអភិវឌ្ឍធនធានមនុស្ស ដែលគោលដៅរួម គឺធ្វើយ៉ាងណាគាំទ្រភាពរីកចម្រើនក្នុងជីវិត សង្គម និងប្រទេសជាតិ។ ប្រទេសជាច្រើនបានវិវត្តន៍ទៅរកបច្ចេកទេសជឿនលឿន និងវិធីសាស្ត្រថ្មីៗ ក្នុងន័យបម្រើដល់វិស័យអប់រំនៃធនធានប្រទេសនោះប្រកបដោយប្រសិទ្ធភាព និងភាពប្រកួតប្រជែងនាពេលអនាគត។ ថ្ងៃនេះយើងនឹងនាំប្រិយមិត្តអ្នកអានឱ្យស្គាល់ពីភាពខុសគ្នាខ្លះៗរវាងការអប់រំនៅប្រទេសកម្ពុជា និងនៅសហរដ្ឋអាមេរិក។
ប្រជាជនខ្មែរទូទៅសុទ្ធតែបានដឹងរួចមកហើយថា ក្នុងរយៈពេលប៉ុន្មានឆ្នាំចុងក្រោយនេះ ប្រទេសកម្ពុជា បានខិតខំក្នុងការលើកកម្ពស់វិស័យអប់រំ ដោយក្នុងនោះរួមមាន ការបង្កើតសាលារៀនគ្រប់កម្រិតសិក្សាតាំងពី មត្តេយ្យសិក្សា បឋមសិក្សា អនុវិទ្យាល័យ និងវិទ្យាល័យ។
បើតាមអ្នកជំនាញផ្នែកវិទ្យាសាស្ត្រអប់រំ នៃរាជបណ្ឌិតសភាកម្ពុជា វិស័យអប់រំនៅកម្ពុជា មានការអភិវឌ្ឍរីកចម្រើន នៅតាមសម័យកាល តាមស្ថានភាពប្រទេស និងតាមឆន្ទៈរបស់មេដឹកនាំប្រទេស។ ការអប់រំផ្តល់ឱកាសដល់សិស្សក្នុងការកសាងជំនាញបច្ចេកទេសវិជ្ជាជីវៈ និងជំនាញឯកទេស ដែលអាចធ្វើឱ្យពួកគេអាចមានអាជីពមួយច្បាស់លាស់។
ប្រទេសកម្ពុជាបានឈានចូលក្នុងដំណាក់កាលថ្មីមួយទៀត នៃការអភិវឌ្ឍវិស័យអប់រំ ដែលចាំបាច់ត្រូវយកចិត្តទុកដាក់ទៅលើការពង្រឹងការអប់រំមូលដ្ឋាន និងគុណភាពសិក្សានៅក្នុងក្របខណ្ឌសេដ្ឋកិច្ចជាតិដែលមានលក្ខណៈជាប្រព័ន្ធដ៏ទូលំទូលាយ។ វិស័យអប់រំនៅប្រទេសកម្ពុជានឹងរៀបចំនូវក្របខណ្ឌដែលធានាគុណភាពទូទាំងវិស័យ ដោយផ្អែកលើស្តង់ដារនៃការសិក្សារៀនសូត្រ និងការផ្តល់សេវាដែលឆ្លើយតបទៅ នឹងតម្រូវការរបស់កុមារ សហគមន៍ និងទីផ្សារការងារ។
ការអប់រំនៅប្រទេសកម្ពុជាទៀតសោត ត្រូវបានគ្រប់គ្រងដោយរដ្ឋាភិបាល តាមរយៈក្រសួងអប់រំយុវជន និង កីឡា នៅថ្នាក់ជាតិ និង មន្ទីរអប់រំនៅថ្នាក់ខេត្ត។ ប្រព័ន្ធអប់រំនៅកម្ពុជាមានសាលា ដែលមានកម្រិតដូចជា មត្តេយ្យ បឋមសិក្សា អនុវិទ្យាល័យ វិទ្យាល័យ ការអប់រំនៅឧត្តមសិក្សា បណ្ដុះបណ្ដាល និងវិក្រឹតការ (សម្រាប់គ្រូបង្រៀន) និងការអប់រំវិជ្ជាជីវៈក្រៅប្រព័ន្ធ។ បច្ចុប្បន្នក្រសួងអរប់រំ យុវជន និងកីឡា បានខិតខំជំរុញឱ្យវិស័យអប់រំ យុវជន និងកីឡាទាំងមូលអាចធ្វើការជាមួយគ្នា ដើម្បីឆ្លើយតបនឹងតម្រូវការសង្គម និងសេដ្ឋកិច្ចផងដែរ។ តាមការកត់សម្គាល់បច្ចុប្បន្ន ក្រសួងអប់រំ យុវជន និងកីឡា បានបញ្ជ្រាបកម្មវិធីសិក្សាទំនើបៗស្របតាមស្តង់ដារជាតិ និងអន្តរជាតិ ហើយដើរទន្ទឹមនឹងភាពជឿនលឿននៃបច្ចេកវិទ្យា ដើម្បីធានាឱ្យបាននូវការអប់រំមួយប្រកបដោយសក្តានុពលឆ្លើយតបទៅនឹងតម្រូវការទីផ្សារការងារ និងការប្រកួតប្រទេសជាមួយបណ្តាប្រទេសជិតខាងផងដែរ។
ដោយឡែកបើយើងក្រឡេកមើលមកប្រព័ន្ធអប់រំ និងសាលានៅសហរដ្ឋអាមេរិក គឺខុសគ្នាពីប្រទេសដទៃទៀត និងខុសគ្នាច្រើនពីរដ្ឋមួយទៅរដ្ឋមួយ ហើយរដ្ឋនីមួយៗមានប្រព័ន្ធសាលារដ្ឋផ្ទាល់ខ្លួន។ នៅសហរដ្ឋអាមេរិក សាលារដ្ឋគឺសិក្សាដោយឥតគិតថ្លៃ ហើយសាលាឯកជនត្រូវបានបង់ថ្លៃកម្មវិធីសិក្សា។ ប៉ុន្តែឪពុកម្តាយមានសេរីភាពក្នុងការជ្រើសរើសសាលារដ្ឋ ឬសាលាឯកជនណាមួយសម្រាប់កូនៗរបស់ពួកគេ។
នៅសហរដ្ឋអាមេរិក ការអប់រំថ្នាក់ឧត្តមសិក្សាជាធម្មតាត្រូវបានបែងចែកជា ថ្នាក់បរិញ្ញាប័ត្ររង, ថ្នាក់បរិញ្ញាប័ត្រ (បរិញ្ញាប័ត្រ), ថ្នាក់ក្រោយឧត្តមសិក្សា (អនុបណ្ឌិត និងបណ្ឌិត)។ សាកលវិទ្យាល័យអាមេរិកផ្តោតលើសារៈសំខាន់នៃភាពសម្បូរបែបដែលមានន័យថា ថ្នាក់រៀននីមួយៗ នឹងមានសិស្សនិស្សិតដែលមានអាយុខុសគ្នា សាសនា និងប្រទេសដើមកំណើតខុសៗគ្នា។ ដូច្នេះវាផ្តល់នូវបរិយាកាសសិក្សាមួយដែលពោរពេញទៅដោយភាពសម្បូរបែបដែលជំរុញឱ្យមានការយល់ដឹង និងការផ្សារភ្ជាប់វប្បធម៌រវាងគ្នាទៅវិញទៅមក។
បើតាមអ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន និងជាអតីតសិស្សសិក្សានៅសហរដ្ឋអាមេរិក បានលើកឡើងថា នៅសហរដ្ឋអាមេរិក សម្រាប់ការសិក្សានៅថ្នាក់វិទ្យាល័យ មិនខុសពីសិក្សាថ្នាក់វិទ្យាល័យនៅស្រុកខ្មែរនោះទេ គ្រាន់តែការសិក្សានៅទីនោះគឺមានសកម្មភាពច្រើនជាង ហើយរៀនច្រើនជាង សប្បាយច្រើនជាង មានឱកាសជួបមិត្តភក្តិច្រើនជាង ហើយសកម្មភាពបន្ទាប់ចេញពីរៀនដែលសាលាដាក់ឱ្យក៏មានច្រើនជាងនៅស្រុកខ្មែរដែរ។
ត្រង់ចំណុចនេះ លោកសង្កត់ធ្ងន់ថា ប្រព័ន្ធអប់រំនៅស្រុកគេ គឺធ្វើឱ្យសិស្សមានគំនិតទូលំទូលាយ ធ្វើឱ្យយើងហ៊ាន និងក្លាហាន ទោះវិន័យនៅទីនោះតឹងតែងពិតមែន ប៉ុន្តែធ្វើឱ្យយើងមានសណ្តាប់ធ្នាប់ ធ្វើឱ្យយើងយល់អំពីវប្បធម៌ និង ពូជសាសន៍ជាច្រើនទៀតផងដែរ។
មកដល់បច្ចុប្បន្ននេះ សិស្សានុសិស្សជាច្រើនមានក្តីស្រមៃចង់ផ្លាស់ប្តូរបទពិសោធសិក្សា ក៏ដូចជាក្រេបជញ្ជក់ចំណេះដឹងនៅសហរដ្ឋអាមេរិក។ ក្រៅពីទទួលបានការអប់រំ សិស្សក៏អាចទទួលបានដំណើរកម្សាន្តដ៏អស្ចារ្យ និងការសិក្សាពីមជ្ឍដ្ឋានខាងក្រៅផងដែរ។ ដូច្នេះបើអ្នកមានចំណាប់អារម្មណ៍ទៅសិក្សានៅសហរដ្ឋអាមេរិក អាយស៊ីអ៊ីអេស (ខេមបូឌា) នៅទីនេះដើម្បីបង្ហាញផ្លូវដល់អ្នក។ ចុះឈ្មោះចូលរួមកម្មវិធីផ្លាស់ប្តូរការសិក្សាឥឡូវនេះ ដើម្បីបន្តដំណើរផ្សងព្រេងដ៏រំភើប និងការសិក្សាដ៏រីករាយនៅសហរដ្ឋអាមេរិក!
សម្រាប់ព័ត៌មានបន្ថែមអំពីរបៀបដែលអ្នកអាចចូលរួមក្នុងកម្មវិធីសិក្សាថ្នាក់វិទ្យាល័យជាមួយអាយស៊ីអ៊ីអេស (ខេមបូឌា) ព្រមទាំងតម្លៃសិក្សា និងដំណើរការដាក់ពាក្យសូមទាក់ទងមកកាន់លេខទូរសព្ទ៖ ០៩៨ ៦៨៦ ៩០១ ឬ០៦១ ៩២៤ ១៤១។ ដើម្បីមានសិទ្ធិចូលរួម អ្នកត្រូវតែឆ្លងកាត់ ការតេស្តជំនាញភាសាអង់គ្លេសដែលផ្តល់ដោយអាយស៊ីអ៊ីអេស (ខេមបូឌា) និងកំណត់ត្រាសិក្សាល្អ (មធ្យមភាគនិទេ្ទស «C» លើមុខវិជ្ជាសំខាន់ៗក្នុងរយៈពេល៣ ឆ្នាំចុងក្រោយ)។ ចុះឈ្មោះដើម្បីធ្វើតេស្តភាសាអង់គ្លេស៖ https://forms.gle/kssVi53beRzEQYmY6. https://forms.gle/BoKRxGGac8Aw7CYv7.