សិស្សផ្លាស់ប្តូរការសិក្សារបស់ អាយស៊ីអ៊ីអេស (ខេមបូឌា) ចែករំលែកពីបទពិសោធន៍ក្នុងការចូលរួមពិធីបុណ្យណូអែលជាលើកដំបូងរបស់ពួកគេនៅសហរដ្ឋអាមេរិក
នៅពេលដែលគេសួរទៅកាន់ជនជាតិអាមេរិកថា តើថ្ងៃបុណ្យមួយណាសំខាន់ជាងគេនៅក្នុងប្រទេសរបស់គាត់? ពិធីបុណ្យទីមួយដែលគាត់តែងតែគិតដល់មុនគេនោះគឺជាពិធីបុណ្យណូអែលដែលប្រារព្ធឡើងដើម្បីរម្លឹកពីការប្រសូតរបស់ព្រះយេស៊ូវ។
យោងតាមការស្រាវជ្រាវ ជនជាតិអាមេរិកប្រាំបួននាក់ក្នុងចំណោមដប់នាក់បាននិយាយថា ពួកគេប្រារព្ធពិធីបុណ្យណូអែល។ ទំនៀមទម្លាប់នៃពិធីបុណ្យណូអែលជាទូទៅត្រូវបានប្រារព្ធឡើងដោយអ្នកដែលមិនមែនជាអ្នកកាន់សាសនា ឬអ្នកជឿសាសនាណាមួយឡើយ ដូច្នេះហើយទើបធ្វើឱ្យទំនៀមទម្លាប់បុណ្យណូអែលមួយចំនួនបានក្លាយទៅជាប្រពៃណីរបស់ក្រុមគ្រួសារជនជាតិអាមេរិក។
ការដើរទិញឥវ៉ាន់សម្រាប់ពិធីបុណ្យណូអែលក្នុងខែធ្នូគឺជាសកម្មភាពចម្បងរបស់ជនជាតិអាមេរិកជាច្រើន។ ពួកគេបានជូនកាដូរទៅកាន់ក្មេងៗ សមាជិកក្នុងគ្រួសារ និងមិត្តភក្តិជិតស្និទ្ធរបស់ពួកគេផងដែរ។ ជនជាតិអាមេរិកភាគច្រើនក៏បានសរសេរកាតជូនពរផ្ញើទៅកាន់មិត្តភ័ក្តិ និងក្រុមគ្រួសាររបស់ពួកគេក្នុងអំឡុងពេលបុណ្យណូអែល។
ជនជាតិអាមេរិកតែងតែងតែរីករាយក្នុងការតុបតែងលម្អសម្រាប់ពិធីបុណ្យណូអែល។ ក្រុមគ្រួសារភាគច្រើនបានដាក់លម្អដើមណូអែលនៅក្នុងផ្ទះរបស់ពួកគេដោយមានចងភ្លើងតូចៗជុំវិញ។ ចំណែកឯកាដូត្រូវបានគេដាក់នៅខាងក្រោមជុំវិញដើមណូអែលទុកសម្រាប់បើកមើលនៅក្នុងថ្ងៃបុណ្យណូអែលតែម្ដង។
ការជួបជុំពិសារអាហារពេលល្ងាចក្នុងថ្ងៃបុណ្យណូអែលគឺជាផ្នែកធំមួយនៃប្រពៃណីបុណ្យណូអែលរបស់ជនជាតិអាមេរិក។ មិត្តភ័ក្តិ និងក្រុមគ្រួសារបានមកជួបជុំគ្នាសម្រាប់ពិធីជប់លៀង ហើយក៏បានទទួលទានសាច់ទួរគីជាមួយនំបុ័ង ដំឡូងបារាំងកិន ទឹកជ្រលក់ cranberry និងសាច់ហេម។ បន្ទាប់មកពួកគេក៏មានជាបង្អែមដូចជាបង្អែមផ្លែល្ពៅ ឬបង្អែមនំផ្លែប៉ោម។ ពិធីជប់លៀងពេលល្ងាចនឹងត្រូវបានបន្តដោយការលេងហ្គេម ឬសកម្មភាពសប្បាយៗផ្សេងទៀត។ សម្រាប់ជនជាតិអាមេរិក វាគឺពិតជា "ពេលវេលាដ៏អស្ចារ្យបំផុតប្រចាំឆ្នាំ"។
ជាលើកដំបូងនៅក្នុងជីវិតរបស់ពួកគេ សិស្សផ្លាស់ប្តូរការសិក្សាជំនាន់ទី៣របស់ អាយស៊ីអ៊ីអេស (ខេមបូឌា) ដែលកំពុងតែសិក្សានៅវិទ្យាល័យនៅសហរដ្ឋអាមេរិកបានបង្ហាញពីការប្រារព្ធពិធីបុណ្យណូអែលរបស់ជនជាតិអាមេរិក។ កាលពីសប្តាហ៍មុន ពួកគេទទួលបានបទពិសោធន៍យ៉ាងរីករាយជាមួយនឹងគ្រួសារចិញ្ចឹមរបស់ពួកគេ ហើយអ្វីដែលកាន់តែពិសេសនោះ គឺពួកគេអាចចែករម្លែករឿងរ៉ាវទាំងនោះនៅពេលដែលពួកគេត្រលប់មកប្រទេសកំណើតវិញ។
ទាំងនេះគឺជាពាក្យពេជន៍របស់ពួកគេដែលចែកចាយអំពីបទពិសោធន៍ក្នុងពិធីបុណ្យណូអែលនៅសហរដ្ឋអាមេរិក ៖
អៀ ជាលាង
ជាសិស្សសិក្សានៅវិទ្យាល័យ Mustang ក្នុងរដ្ឋអូក្លាហូម៉ា
បទពិសោធន៍ក្នុងពិធីបុណ្យណូអែលគឺអស្ចារ្យណាស់សម្រាប់ខ្ញុំ។ ខ្ញុំ និងគ្រួសារចិញ្ចឹមរបស់ខ្ញុំបានចម្អិនអាហារជាច្រើន ហើយយើងក៏បានវេចខ្ចប់កាដូ តុបតែងផ្ទះ ដើរទិញឥវ៉ាន់ និងធ្វើសកមក្មភាពផ្សេងៗទៀត។ ជនជាតិអាមេរិកចូលចិត្តរៀបចំកាដូនៅខាងក្រោមជុំវិញដើមណូអែល។ ដំបូង យើងបានហែកកញ្ចប់កាដូពីខាងក្រុមគ្រួសារឪពុកចិញ្ចឹមរបស់ខ្ញុំ បន្ទាប់មកយើងក៏បានហែកកញ្ចប់កាដូពីខាងក្រុមគ្រួសារម្ដាយចិញ្ចឹមរបស់ខ្ញុំវិញម្ដង។ បន្ទាប់មកទៀត យើងក៏បានទៅជិះរថភ្លើងលេងនៅ The Polar Express។ នៅថ្ងៃបុណ្យណូអែល យើងបានទៅចូលរួមពិធីបុណ្យនៃពន្លឺនៅឯព្រះវិហារ។ លើសពីនេះ យើងពិតជាមានភាពសប្បាយរីករាយណាស់ក្នុងការរៀបចំកាដូបន្ថែមទៀត។ ខ្ញុំទទួលបានកាដូជាច្រើនពីគ្រួសារចញ្ចឹម និងសាច់ញាតិរបស់ពួកគេដូចជា៖ ស្ករគ្រាប់ អាហារសម្រន់ ស្រោមជើង កន្សែង គ្រឿងសម្អាង ទឹកជូតមុខ និងរបស់របរផ្សេងៗទៀត!
ចំរើន អមរា
ជាសិស្សសិក្សានៅវិទ្យាល័យ Foyil Claremore, ក្នុងរដ្ឋអូក្លាហូម៉ា
នៅពេលដែលរដូវកាលបុណ្យណូអែលចូលមកដល់ ខ្ញុំ និងគ្រួសារចិញ្ចឹមរបស់ខ្ញុំបានតុបតែងផ្ទះ និងលម្អដើមណូអែល។ នៅថ្ងៃបុណ្យណូអែល យើងមានការប្រកួតគ្នាធ្វើនំខ្ញី ហើយវាជាបទពិសោធន៍ថ្មីមួយទៀតសម្រាប់ខ្ញុំ។ នៅព្រឹកថ្ងៃបុណ្យណូអែល គ្រួសារចិញ្ចឹមរបស់ខ្ញុំ និងខ្ញុំបានភ្ញាក់ពីព្រលឹមដើម្បីហែកកញ្ចប់កាដូ។ យើងទាំងអស់គ្នាបានទទួលកាដូពីសាន់តា (Santa) ហើយក៏បានចំណាយពេលហែកកញ្ចប់កាដូឱ្យគ្នាទៅវិញទៅមក។ វាពិតជាពេលវេលាដ៏រីករាយណាស់។
សំអាត រ័ត្នរាជិនី
ជាសិស្សសិក្សានៅវិទ្យាល័យ Fennimore, រដ្ឋ Wisconsin
គ្រួសារចិញ្ចឹមរបស់ខ្ញុំ និងខ្ញុំបានទៅទិញដើមឈើលម្អសម្រាប់បុណ្យណូអែលជាមួយគ្នា។ យើងបានតុបតែងដើមឈើណូអែលដោយភ្លើងតូចៗ ស្កគ្រាប់ និងគ្រឿងលម្អផ្សេងៗទៀត។ ម្ដាយចិញ្ចឹមរបស់ខ្ញុំ និងប្អូនស្រីរបស់ខ្ញុំបានធ្វើប្រតិទិនក្នុងខែធ្នូដែលប្រើសម្រាប់រាប់ថ្ងៃមកដល់នៃពិធីបុណ្យណូអែល។ ខ្ញុំបានទទួលស្ករគ្រាប់ និងរបស់លេងជាច្រើនមុនថ្ងៃបុណ្យណូអែល។ ខ្ញុំក៏បានជួយម្តាយចិញ្ចឹមរបស់ខ្ញុំក្នុងការវេចខ្ចប់កាដូសម្រាប់អ្នករាល់គ្នាផងដែរ។ នៅក្នុងសាលារៀន មិត្តភក្តិរបស់ខ្ញុំ និងខ្ញុំបានធ្វើជាសាន់តាលាក់មុខ (Secret Santa) ។ ក្នុងការធ្វើជាសាន់តាលាក់មុខ (Secret Santa) ខ្ញុំទទួលបានស្ករគ្រាប់ និងស្រោមជើងជាច្រើន។ ហើយក៏មានមនុស្សមួយចំនួនទៀតបានឱ្យខ្ញុំនូវស្ករគ្រាប់អាមេរិចបន្ថែមទៀតដើម្បីភ្លក្សរសជាតិថ្មី។ ខ្ញុំមិនមានការត្អូញត្អែរ ឬនឿយហត់ទេ ព្រោះខ្ញុំស្រឡាញ់ក្នុងការសាកល្បងអ្វីដែលថ្មី។
សូណាឡែន សាំង
ជាសិស្សសិក្សានៅវិទ្យាល័យ Santa Fe ក្នុងរដ្ឋអូក្លាហូម៉ា
គ្រួសារចិញ្ចឹមរបស់ខ្ញុំ និងខ្ញុំ ព្រមទាំងឆ្កែពីរក្បាលទៀតបានប្រារព្ធពិធីបុណ្យណូអែលនៅឯផ្ទះ ហើយខ្ញុំទទួលបានកាដូជាច្រើនពីគ្រួសារចិញ្ចឹមរបស់ខ្ញុំ។ យើងបានមើលកុនជាមួយគ្នា ស្ដាប់ចម្រៀងណូអែល ចម្អិនអាហារ លេងហ្គេម ហើយតែងផ្ទះដែលធ្វើពីនំប៉័ងខ្ញីផងដែរ ប៉ុន្តែពួកយើងមិនបានវេចខ្ចប់កាដូនោះទេ។ គ្រួសាររបស់ម្តាយចិញ្ចឹមខ្ញុំនឹងមកលេងពួកយើងនៅក្នុងសប្តាហ៍នេះ ហើយខ្ញុំពិតជារំភើបណាស់ដែលបានជួបពួកគាត់។
ការចូលរួមក្នុងពិធីបុណ្យ និងការប្រារព្ធពិធីផ្សេងៗគឺជាអត្ថប្រយោជន៍យ៉ាងពិតប្រាកដមួយដែលភ្ជាប់មកតាមរយៈកម្មវិធីផ្លាស់ប្តូរការសិក្សា បន្ថែមពីលើកម្មវិធីផ្សេងៗជាច្រើនទៀតដូចជាការពង្រឹងជំនាញភាសាអង់គ្លេស និងការទទួលបានបទពិសោធន៍ការសិក្សាលក្ខណៈពិសេស។ ហើយអ្នកក៏អាចធ្វើវាបានដែរ ចុះឈ្មោះឥឡូវនេះសម្រាប់កម្មវិធីផ្លាស់ប្តូរការសិក្សាជាមួយ អាយស៊ីអ៊ីអេស (ខេមបូឌា) ដើម្បីចូលរួមដំណើរផ្សងព្រេងដ៏រំភើបនៅឯបរទេស!
សម្រាប់ព័ត៌មានបន្ថែមអំពីរបៀបដែលអ្នកអាចទៅសិក្សាថ្នាក់វិទ្យាល័យនៅឯបរទេសជាមួយអាយស៊ីអ៊ីអេស (ខេមបូឌា) ក៏ដូចជាតម្លៃសេវាកម្ម និងដំណើរការដាក់ពាក្យ សូមទាក់ទងមកកាន់លេខ ០៦១ ៩២៤ ១៤១ ឬ០៩៨ ៦៨៦ ៩០១។ ដើម្បីមានសិទ្ធិចូលរួម អ្នកត្រូវតែប្រលងតេស្តសមត្ថភាពភាសាអង់គ្លេសដែលផ្តល់ដោយអាយស៊ីអ៊ីអេស (ខេមបូឌា) និងមានកំណត់ត្រាសិក្សាល្អ (មធ្យមភាគនិទេ្ទស «C» នៅក្នុងមុខវិជ្ជាសំខាន់ៗសម្រាប់រយៈពេល ៣ ឆ្នាំចុងក្រោយ)។ ចុះឈ្មោះឥឡូវនេះ ដើម្បីធ្វើតេស្តភាសាអង់គ្លេសតាមរយៈ៖ https://forms.gle/3qifKLu79f4hx5uB7 ៕
